Avqustda keçirilməsi nəzərdə tutulan VII çağırış parlament seçkiləri sentyabrda baş tuta bilər.

Bu barədə Onews.az-a etibarlı qaynaqlardan məlumat daxil olub.

Verilən məlumatlara görə, buna səbəb avqust ayında müəllimlərin məzuniyyətdə olmasıdır. Təhsil işçilərinin məzuniyyəti isə avqustun 26-da bitir.

Bu da o deməkdir ki, avqustun son beş günündə seçkilərin keçirilməsi ehtimalı azdır. Ona görə də ehtimal etmək olar ki, seçkilərin sentyabrın birinci və ya ikinci ongünlüyündə gerçəkləşə bilər.

Digər qaynaqlardan əldə etdiyimiz bilgilərə görə, növbəti çağırış parlament seçkiləri elə avqust ayında baş tutacaq.

İddia olunur ki, avqusta qədər bütün dövlət idarə və müəssisələrində məzuniyyətlər başa çatacaq.

Yəni, hər bir dövlət qulluqçusu və dövlət idarələrində çalışan şəxs seçkilərə görə, avqustun 1-nə qədər məzuniyyətdən geri dönəcəklər.

Noyabr ayında ölkəmizdə COP-29 tədbiri gerçəkləşəcək. Məhz bu səbəbdən də parlament seçkilərinin bir an öncə keçirilməsi planlaşdırılır.
Qeyd edək ki, ilin sonuncu ayında ölkəmizdə bələdiyyə seçkilərinin keçirilməsi nəzərdə tutulur.

Turan