"Hələlik Avropa Birliyi Gürcüstanda məğlub oldu. Kreml Tiflisə öz qırmızı dişlərini qıcadı. Nəticədə şimal-qərb qonşumuz Qərbə inteqrasiya yolunda bir addım geriyə çəkildi. Amma Moskva qarşıdakı dövrdə bu geriçəkilmənin qarşılığı olaraq gürcü xalqına nəsə verməsə, o zaman Qərb yaxın vaxtlarda Gürcüstana yenidən qayıdacaq".

Bunu Onews.az-a açıqlamasında siyasi şərhçi Tural Turan deyib.

Ekspertin fikrincə, budəfəki qayıdış Rusiya üçün daha ağır nəticələrə gətirib çıxara bilər:

"İndi Bidzina İvanişvilinin moderatorluğundakı hakim partiya Abxaziya, Osetiya problemlərindən ən azı birini həll etmək üçün Kremllə danışıqlara başlamalıdır. Çünkü gürcü xalqı 2008-ci il savaşından sonra hələ də ruslara düşmən, işğalçı gözü ilə baxır. Fikrimcə, ən azından Cənubi Osetiyada Gürcüstanın suverenliyini bərpa etmək mümkündür. Qərb Ukrayna ilə savaşda Kiyevi Moskva ilə baş-başa qoyarsa və ukraynalılara əsaslı dönüş yarada biləcək yardımlar göstərməsə, o zaman Avropa koalisiyasının əl-ayağı regiondan tamamilə üzüləcək. Bu isə Güney Qafqazda Rusiya hökümlülüyünün, diqtəsinin əbədi olması anlamına gələcək. İndi Qərb də, Avropadan üz döndərib Rusiyaya meyillənən İvanişvili dirijorluğundakı Gürcüstan iqtidarı da çoxgedişli və mürəkkəb kombinasiyalı bu oyunda öz partiyaları haqqında yüz ölçüb bir biçməlidir".

Banu Murad