İqlim dəyişikliyi bəşəriyyətin üzləşdiyi ən ciddi problemlərdən biridir və dünya bu yeni reallıqlara uyğunlaşmaq məcburiyyətindədir.

Bu məsələyə yalnız təhlükə nöqteyi-nəzərindən deyil, yaranan imkanlar baxımından da yanaşmaq lazımdır. Hazırda əsas müzakirə mövzusu iqlim dəyişikliyi nəticəsində “yaşıl” iş yerlərinin və yeni peşə sahələrinin yaranıb-yaranmamasıdır.

Mənim fikrimcə, biz təkcə iqlim dəyişikliyi ilə mübarizə aparmırıq, həm də tamamilə yeni reallıqlarla üz-üzəyik və bu reallıqlara uyğunlaşmaq üçün fərqli düşünməli, həyat tərzimizi və iş üsullarımızı dəyişməliyik. Artıq təkcə iqlim və ekologiya sahəsində bacarıqlara deyil, həm də həyatımızın bir hissəsinə çevrilən süni intellekt kimi texnologiyalara ehtiyac duyulur.

Bu yeni reallıqlar təhsil sahəsində də öz əksini tapmalıdır.Biz nə qədər tez yeni texnologiya ilə ayaqlaşsaq o qədər çox bu reallıqdan karlı çixarıq. Uşaqlarımıza və gənclərimizə yeni dayanıqlı inkişaf təcrübələrini öyrədəcək iqlim savadlılığı proqramlarına ehtiyacımız var. Bunun ən qısa yolu isə təhsildə innovativ yeniliklərin tətbiqidir.

Azərbaycanın Pre-COP29 tədbirini uğurla təşkil etməsi, ölkəmizin iqlim dəyişikliyi ilə mübarizədə fəal iştirakını və beynəlxalq səviyyədə əhəmiyyətli rolunu bir daha sübut edir. Bakı, bu cür qlobal tədbirlər üçün ideal platforma olmaqla, dünyanın iqlim dəyişikliyi ilə bağlı yeni həll yollarının müzakirəsi üçün beynəlxalq məkan rolunu oynadı. Azərbaycanın bu tədbirdəki ev sahibliyi həm milli, həm də beynəlxalq səviyyədə iqlim tədbirlərinin gücləndirilməsinə mühüm töhfə verdi.

Yaşıl iş yerlərinin yaradılması təkcə iqlim dəyişikliyi ilə mübarizənin deyil, həm də dayanıqlı iqtisadi inkişafın əsas elementlərindən biridir. Bu cür iş yerləri, təbii ehtiyatlardan səmərəli istifadə edərək ətraf mühitə minimal təsir göstərən iqtisadi fəaliyyəti təşviq edir. Yaşıl iqtisadiyyat sektorunun inkişafı həm iqtisadi sabitliyi gücləndirir, həm də ətraf mühitin qorunmasına töhfə verir.

Bu sahədə iş yerlərinin yaradılması, xüsusilə bərpa olunan enerji, tullantıların idarə olunması, su ehtiyatlarının qorunması və ekoloji cəhətdən təmiz texnologiyaların tətbiqi kimi sahələrdə geniş imkanlar açır.

Məsələn, günəş və külək enerjisi layihələri üzrə ixtisaslaşmış mühəndislər, ekoloji təmiz infrastrukturun layihələndirilməsi ilə məşğul olan mütəxəssislər və ya ekoloji təhsil sahəsində çalışanlar bu yeni iş yerlərinin əsas iştirakçılarıdır.

Digər önəmli faktor odurki yaşıl iş yerlərinin yaradılması həm də sosial ədalətin təmin edilməsinə kömək edir. Bu iş yerləri müxtəlif peşə sahələri üzrə yeni iş imkanları yaradaraq, həm ali təhsilli, həm də peşə təhsili alan insanlar üçün geniş karyera yolları açır.

Bu, cəmiyyətin müxtəlif təbəqələri arasında iqtisadi imkanları artırır və iqlim dəyişikliyi ilə mübarizədə cəmiyyətin bütün təbəqələrinin iştirakını təmin edir.

Bundan əlavə, yaşıl iş yerlərinin inkişafı gələcək nəsillər üçün daha təhlükəsiz və dayanıqlı həyat şəraitini təmin etməyə imkan verir. Belə desək övladlarımız və nəvələrimiz üçün ekoloji təmiz mühitin təməllərini atırıq.

Elgün Rüstəmlilər