"İndi Güney Qafqazda savaş istəyən və Ermənistanı bu savaşa təhrik edən əsas tərəflər Fransa, Hindistan və Yunanıstandır. Hər üç dövlət Ermənistandakı beyni yuyulmuş bəzi dairələri, terror qruplaşmalarını Azərbaycandan qisas almağa, revanş götürməyə təhrik edirlər. Amma onların əsas məqsədi başqadır".

Bunu Onews.az-a açıqlamasında siyasi şərhçi Tural Turan deyib.

Ekspertin fikrincə, Fransa və Hindistanın Güney Qafqazda yeni savaş ssenarisinin alt qatında fərqli nüanslar dayanır:

"Birincisi, Paris və Dehli İrəvana göndərdiyi köhnə silahların "çox yaxşı işlədiyini" göstərmək və həmin əski silahları ikinci növ alıcılara sırımaq istəyirlər. Əgər Ermənistan-Azərbaycan sərhədində belə bir qarşıdurma yaşanarsa, fransız və hind mediası döyüşlərin gedişindən daha çox Ermənistana satılan silahların "yüksək səviyyədə işləkliyini" dünya silah bazarındakı "ölü alıcılara" göstərməyə, "sübut etməyə" çalışacaq. Onlar üçün bu qarşıdurmada Ermənistanın yenilib-yenilmədiyi elə də önəmli olmayacaq. İkincisi, Türk birliyinin əsas aktora çevrilməsinin qarşısını almaq istəyirlər. Bu baxımdan, diqqəti Zəngəzur bölgəsindən yayındırmaq üçün Göyçə-Zod, Cermux-Basarkeçər istiqamətinə 10 min terrorçu yığması üçün Ermənistana külli miqdarda vəsait ayırırlar. Üçüncüsü, öz aləmlərində 30 illik "dondurulmuş" münaqişəni həll edən və münaqişələr tarixində işğala məruz qalan ölkələrə nümunə olan, bu müstəvidə dünyada bütün layları yerindən oynadan Azərbaycana gözdağı vermək niyyətindədirlər. Əminəm ki, Qərbin və Ermənistanın "alması çürük üç bacısının" bu məkrli planları baş tutmayacaq. Çünki Azərbaycan indi oyun quruculuğunun bütün istiqamətlərində hücumda olan tərəfdir".

Banu Murad

#turalturan #Azərbaycan #Ermənistan #Fransa