Ümidlərin son notu

(Azərbaycanın Milli Qəhrəmanı Hökumə xanım Əliyevaya...)

Bir səs eşitdim, bir səs
gəlinlik donu geydirdi
bütün qorxulara.

Bir səs eşitdim, bir səs
ümid verdi
kölgəsindən asılan yuxulara.

Bir səs eşitdim bu səhər,
buludların çiyninə örpək oldu.

Bir səs eşitdim bu səhər
ünvanını unutmuş
son duadan kükrək oldu.

O səsə qoşulub qaçdı,
göz yaşının yanan üzü.
O səsdə min çiçək açdı,
bir ölümün ayaq izi...

O səs tapdı günəşin
itkin düşən əllərini.
O səs tapdı bir atəşin
yoxa çıxan dillərini...

Bir səs eşitdim, bir səs;
göy üzünə açdı qucaq:
Ümidlərin son notudu:
- "Hər şey yaxşı olacaq..."

Tural Turan
Şair

Onews.az