Dünən axşamüstündən Masazırda, Səyavuş Aslan küçəsi 1-dəki MTK-da (yaşadığımız binada) işıqlar sönüb.

Səbəb isə transformatorun xarab olması göstərilir.

Binanın istiliyi elektriklə təmin olunur. Binaya qaz verilməyib. Gecə səhərə qədər soyuqdan donmuşuq.

Oğlum Mete hazırda 38,5 qızdırma içərisində od tutub yanır.

Dünən axşamdan AZƏRİŞIQ-a zəng edirəm. Gah dedilər briqada göndəririk. Qurumun mətbuat xidmətinin rəhbəri ilə əlaqə saxladım.

Sağ olsun, məsələni diqqətə götürdü, amma sonra verilən cavabdan bir nəticə hasil olmadı. AZƏRİŞIQ-ın sözçüsü Vaqif müəllimin cavabını olduğu kimi təqdim edirəm:

"[20.01, 19:04] Jur Vaqif Aydınoğlu Azərişıq MK: Etiraznızı MTK ya bildirin xahiş edirəm. O bina ümumiyyətlə bizim balansa verilməyib. MTK məsuliyyəti boynundan atmaq üçün bu gün ayılıb.
[20.01, 19:05] Jur Vaqif Aydınoğlu Azərişıq MK: Zəhmət çəkib vaxtında işlərini qanuni şəkildə edərdi
[20.01, 19:05] Jur Vaqif Aydınoğlu Azərişıq MK: hazır olmayan, təhvil verilməyən binaya adam köçürməzlər".

Bu cavabdan sonra MTK rəhbərliyinə üz tutdum. Bildirdilər ki, təzə transformatorlar alınıb, AZƏRİŞIQ onların xəttə qoşulması üçün on minlərlə manat rüşvət tələb edir.

Binaya bu vaxta qədər qaz verilməməsinin səbəbini də vaxtilə FHN-nin külli miqdarda rüşvət tələb etməsi ilə əlaqələndirirdilər. Hazırda bina rəhbərliyi qaz xətlərinin çəkildiyini iddia etsələr də, ortada heç nə yoxdur. MTK-ya məxsus hər üç bina qazsızdır.

Əlqərəz, bu gecə səhərə kimu üç binanın sakinləri işıqsız qalıb. Sakinlərin bir qismi gecə səhərə qədər şəxsi avtomobillərdə gecələyiblər. Mənim kimi şəxsi avtomobili olmayanlar isə iki yorğanı üst-üstə sərərək yatıb.

Böyük adam bir təhər dözə bilir, bəs xəstə azyaşlıları hara qoyursunuz?! Bu qədər biveclik, rəzillik olmaz axı...

Bina rəhbərliyi AZƏRİŞIQ-ı, AZƏRIŞIQ da MTK-nı günahlandırır.

Buradan üzümü Azərbaycanın Prezidentinə, Birinci vitse-prezidentinə, Daxili İşlər Nazirliyinə, Baş Prokurorluğa üzümü tuturam. Bizə kömək olun, hansısa qurumların məsuliyyətsizliyinin qurbanı olmaq istəmirik.

Kömək edin ki, 36 ildən sonra bu müstəqil ölkə məsuliyyətsiz və biganə qurumların 20 Yanvar faciəsini, dəhşətini yaşamasın.

Şaxtalı soyuq dünən gecədən bədənimizi güllə yağışına tutsa da, hələ ki, sağıq, amma xəstə övladlarımızın baxışlarında can veririk. Allah heç bir atanı övladı yanında, dövlət babanı da vətəndaşının qarşısında başıaşağı eləməsin. Amin!

Tural Turan
Onews.az