“Gənclər Şəbəkəsi Təşəbbüsü” İctimai Birliyi tərəfindən Şəmkir rayonunda qadın sahibkarlığının inkişafına dəstək məqsədilə layihə həyata keçirilib.
Layihənin əsas məqsədi regionda yaşayan qadınların iqtisadi fəallığının artırılması, onların biznes bacarıqlarının inkişaf etdirilməsi və kiçik sahibkarlıq təşəbbüslərinə dəstək göstərilməsidir.
Tədbir çərçivəsində iştirakçılara qadın sahibkarlığının imkanları, biznes ideyanın formalaşdırılması, maliyyə savadlılığı, bazara çıxış və şəxsi brendin qurulması mövzularında məlumat verilib. Eyni zamanda qadınların yerli iqtisadiyyatda rolunun gücləndirilməsi və məşğulluq imkanlarının genişləndirilməsi ətrafında fikir mübadiləsi aparılıb.
Qeyd olunub ki, regionlarda qadın sahibkarlığının dəstəklənməsi yalnız fərdi gəlir imkanlarının artırılması deyil, həm də ailələrin sosial rifahına, yerli iqtisadiyyatın canlanmasına və icmalarda dayanıqlı inkişafın təmin olunmasına mühüm töhfə verir.
“Gənclər Şəbəkəsi Təşəbbüsü” İctimai Birliyi bundan sonra da qadınların iqtisadi və sosial həyatda daha fəal iştirakına yönəlmiş layihələri davam etdirməyi planlaşdırır.