Donald Trampın hakimiyyəti dönəmində İrana qarşı müharibə istisna edilmir. Çox güman ki, bu Trampın hakimiyyətinin ilk aylarına təsadüf etməyəcək.

ABŞ hər zaman Xəzər dənizində möhkəmlənməkdə maraqlı olub.

ABŞ İran və Rusiyanı bu hövzədə tamamilə neytrallaşdırmaq istəyir.

İqtisadi müstəvidə Birləşmiş Ştatlar bunu bacarıb. Amma hərbi-siyasi müstəvidə bu o qədər də real və inandırıcı görünmür. Çünki İranı neytrallaşdırsa belə, Vaşinqton Rusiya amilini ciddi şəkildə nəzərə almağa borcludur.

Düşünürəm ki, yaxın dörd il ərzində də ABŞ donanmasını Xəzərdə görməyəcəyik. Amma iqtisadi baxımdan bu mümkündür. Artıq ABŞ şirkətləri Qazaxıstan və Türkmənistan neftinə sahib olmaq üçün gizli danışıqlara start verib.

Doğrusu, Qazaxıstandan fərqli olaraq Türkmənistan bu məsələyə daha isti baxır. Çünki Aşqabad rus asılılığından xilas olmağa çalışır. Qazaxıstan isə hazırda soyuq suyu da üfürə-üfürə içir. Almatı ABŞ-dan daha çox Çinlə yaxınlaşmağı üstün tutur.

Mənə görə Çini cilovlamaq bu müddətdə bir qədər çətin olacaq. Artıq Çin şirkətləri Qazaxıstanın Tengiz yatağı ilə maraqlanmağa başlayıblar. Sürtgü yağları üçün kükürdlü neftə ehtiyacları var. Qazax nefti də kükürdlə zəngindir.

Fikrimcə, ABŞ qarşıdakı illərdə Xəzərdə möhkəmlənə bilməyəcək. Ən yaxşı halda danışıqlar masasında hövzə ölkələrinin "saqqızını oğurlamağa" çalışacaq.

Sona Əliyeva
V çağırış Milli Məclisin deputatı
Onews.az