Hazırda Suriyanın xarici siyasətinin əsas dirijoru və müəyyən mənada moderatoru qardaş Türkiyədir.

Ankara bəzi daxili məsələlərdə də Dəməşqdə aktiv rol almağa çalışır.

Maraqlı faktlardan biri də odur ki, Suriyada yeni hökumətin formalaşmasında da Türkiyənin nəfəsi hiss olunur.

Əsəd rejimindən sonra yeni dönəmin ilk xarici işlər naziri Əş Şeybani Türkiyədə təhsil almış şəxsdir. İxtisasca mədəniyyətşünas olan Şeybani İstanbuldakı Səbahəttin Zaim universitetindən məzun olub.

Bundan başqa, daha çox türkmən qardaşlarımızın yaşadığı Hələbin çiçəyi burnunda valisi Əz Zamqalib də Türkiyədə təhsil almış füqurdur.

Qardaş ölkənin baş diplomatı Hakan Fidanın 22 dekabrda Dəməşqə səfərindən sonra prezident Recep Tayyip Erdoğanın da Suriyaya ziyarəti gözlənilir.

Düşünürəm ki, hər iki ziyarətdən sonra Türkiyədəki suriyalıların ölkələrinə geri dönüşü sürətləndiriləcək.

Bələdiyyə seçkiləri öncəsi Erdoğana samballı statistika lazımdır.

Çox güman ki, Hakan Fidanla HTŞ lideri (legitim rəhbər) Əş Şaara arasında baş tutan qapalı danışıqların əsas mövzularından biri bu olub.

Digər məsələ isə İsrailin Suriyaya hücumlarının dayandırılmasıdır ki, bu istiqamətdə də əsas nizamlayıcı qüvvə kimi məhz Türkiyə görünür.

İranın və Rusiyanın yoxluğunda Türkiyə Suriyadakı bütün "boz nöqtələri" öz rənginə boyamağa çalışacaq. Artıq Ankara Şam və Hələbdə qırmızı düyməyə basıb.

Növbəti həmlə Deyr əz Zor və Qamışlı istiqamətidir. Yəni, Türkiyə PKK və PYD-nin Suriyadan sıxışdırılıb çıxarılmasında və ya tamamilə tərk-silah edilməsində israrlıdır.

Tural Turan
Siyasi şərhçi

Onews.az