"Əgər Rusiya Ukraynada istədiyinə tam şəkildə nail olarsa, o zaman Kremldəki imperialist zehniyyətin növbəti hədəfi Moldova, Gürcüstan və Qazaxıstan ola bilər".

Bunu Onews.az-a açıqlamasında V çağırış Milli Məclisin deputatı, siyasi şərhçi Sona Əliyeva deyib.

Keçmiş millət vəkilinin fikrincə, bunu Qərbdə də yaxşı anlayırlar və Qərbin aparıcı beyin mərkəzləri Ukrayna cəbhəsində Moskvaya "Pir qələbəsi"ndən o yana üstünlük verməməyi vurğulayırlar:

"Rusiya ictimai fikrinə baxdıqda da növbəti hədəfin sıra ilə bu üç ölkə olacağını hiss etmək mümkündür. Artıq Kreml rus ictimai fikrini bu yöndə hazırlamağa başlayıb. Bir sözlə, hətta Vladimir Putin hakimiyyətdən getsə belə, rusların "dərin dövlət" qanadı imperialist siyasətə qaldığı yerdən davam edəcək. Təbii ki, Ukrayna savaşından sonra rusların bir neçə il "time-out" götürəcəyini də unutmaq olmaz. İqtisadi böhrandan çıxış yolu tapılandan və hər şey əvvəlki vəziyyətə qayıtdıqdan sonra Rusiya keçmiş SSRİ-nin bərpası üçün yeni həmlələrə başlayacaq".

Fuad Süleyman