Azərbaycan Yerüstü Nəqliyyat Agetliyi YAP Nərimanov rayon təşkilatı üzrə ƏPT sədri
Orxan Hüseynzadə

Avropa Komissiyasının Prezidenti Ursula Fon der Lyayenin Azərbaycana reallaşan rəsmi səfəri və Prezident İlham Əliyevin bəyanatı, Bakı ilə Brüssel arasındakı münasibətlərin ekoloji və iqtisadi müstəvidə tamamilə yeni bir mərhələyə qədəm qoyduğunu təsdiqləyir. Azərbaycan Prezidentinin formalaşdırdığı uzaqgörən xətt, müasir dövrün qlobal iqlim çağırışlarına və dünyanın gələcək inkişaf hədəflərinə yönəlmiş çox məntiqli və real bir cavab modelidir. Bu çərçivədə iki tərəf arasındakı dialoqun ən mühüm və gələcəyə hesablanmış hissəsini məhz bərpaolunan enerji sahəsi təşkil edir.
Azərbaycan artıq yalnız ənənəvi neft-qaz resurslarının tədarükçüsü deyil, həm də Avropanın gələcək təmiz enerji layihələrində ən yaxın strateji tərəfdaşı olmaq potensialını ortaya qoyur. Ölkəmizin zəngin günəş, külək və su elektrik enerjisi potensialı, həmçinin bu resursların daşınması üçün mövcud olan və gələcəkdə tikiləcək yeni ötürmə xətləri bu tərəfdaşlığın əsas bazasını formalaşdırır.
Prezident İlham Əliyevin rəhbərliyi ilə həyata keçirilən investisiya siyasəti sayəsində, xarici və yerli şirkətlərlə imzalanmış mövcud müqavilələr növbəti 5-6 il ərzində Azərbaycana 8 giqavat həcmində günəş və külək enerjisi əldə etmək imkanı verəcəkdir. Bu rəqəm kağız üzərində qalan bir hədəf deyil, hüquqi baxımdan təsdiqlənmiş konkret bir öhdəlikdir və real hədəflərin miqyasını göstərir. Eyni zamanda, gələcəkdə bu həcmlərin daha da artacağı şübhəsizdir.
Dövlətimizin yürütdüyü bu enerji siyasəti, həm ekoloji balansı qorumaq, həm də dünya naminə təmiz bir gələcək qurmaq üçün atılmış çox mühüm addımdır. Avropa Komissiyasının bu prosesdə təklif etdiyi fəal dəstək ölkəmiz tərəfindən yüksək qiymətləndirilir.
Beləliklə, Azərbaycanın yaşıl enerji sahəsində nümayiş etdirdiyi qətiyyətli siyasət Cənubi Qafqazı münaqişələrdən uzaq, ekoloji baxımdan təmiz və sabit bir tərəfdaşlıq regionuna çevirir.