Azərbaycan Yerüstü Nəqliyyat Agentliyinin (AYNA) Ümumi şöbəsinin baş məsləhətçisi, YAP Nərimanov Rayon Təşkilatı üzrə ƏPT-nin sədr müavini
Səbinə Yunusova

Avropa Komissiyasının Prezidenti Ursula Fon der Lyayenin 1 iyul 2026-cı il tarixində Azərbaycana rəsmi səfəri və Prezident İlham Əliyevin verdiyi bəyanat Bakı ilə Brüssel arasındakı münasibətlərin keyfiyyətcə yeni, strateji mərhələyə qədəm qoyduğunu nümayiş etdirir. Aİ Şurasının Prezidenti cənab Koşta və Avropa diplomatiyasının rəhbəri xanım Kallasın ardınca reallaşan bu mühüm tərəflər arasında tarixi bir fəallığın və yüksələn xətlə inkişaf edən siyasi dialoqun bariz göstəricisidir. Hazırda Azərbaycan regional ticarətin təxminən 70 faizini özündə cəmləşdirməklə Avropa İttifaqının Cənubi Qafqazdakı əsas ticarət tərəfdaşıdır. Strateji tərəfdaşlıq haqqında anlaşma memorandumundan sonra Avropaya qaz ixracını 65 faiz artıran və 10 Aİ üzvünü mavi yanacaqla təmin edən Azərbaycan, 3500 kilometrlik Cənub Qaz Dəhlizi vasitəsilə qitənin enerji və milli təhlükəsizliyində əvəzolunmaz arteriya rolunu oynayır. Bu ənənəvi əməkdaşlıq Şərq-Qərb və Şimal-Cənub nəqliyyat dəhlizləri çərçivəsində infrastrukturun genişləndirilməsi, həmçinin növbəti 5-6 il ərzində 8 giqavatlıq bərpaolunan günəş və külək enerjisi istehsalını hədəfləyən yeni "yaşıl enerji" tərəfdaşlığı ilə daha da şaxələndirilir. İqtisadi və logistik uğurlarla yanaşı, bəyanatın ən fundamental tərəfi regionda yaranmış faktiki sabitlik və sülh mühitidir. Vaşinqtonda sülh prosesi çərçivəsində, Prezident Trampın şahidliyi ilə Azərbaycan və Ermənistan arasında imzalanan birgə bəyannamə və rəsmi razılaşdırılmış sülh sazişi regionda faktiki sülh reallığını bərqərar etmişdir. Azərbaycan regionda formalaşan sülh mühitini əməli addımlarla dəstəklədiyini nümayiş etdirərək Ermənistana daşınan yüklərin tranzit məhdudiyyətlərini tamamilə aradan qaldırmış və bu ölkəyə benzin, dizel kimi strateji yanacaq tədarükünə başlayaraq böyük humanitar və siyasi liderlik göstərmişdir. Bu isə öz növbəsində ölkəmizin regionda sülhün, tərəfdaşlığın və dayanıqlı tərəqqinin əsas aparıcı qüvvəsinə çevrildiyini bir daha təsdiq edir.