Azərbaycan Memarlıq və İnşaat Universiteti (AzMİU) ağır itki ilə üzləşib.

Görkəmli alim, dəyərli pedaqoq və əməkdar müəllim, professor Həsən Qulu oğlu Feyziyev 26 noyabr 2024-cü ildə, 88 yaşında vəfat edib.

Professor Həsən Feyziyev AzMİU-nun inkişafında və istilik təchizatı, istilik texnikası sahəsində dünya miqyaslı elmi nailiyyətlərin əldə edilməsində əvəzsiz xidmətlər göstərmişdir. O, 1978-ci ildən başlayaraq Azərbaycan İnşaat Mühəndisləri İnstitutunda, daha sonra isə Azərbaycan Memarlıq və İnşaat Universitetində “İstilik təchizatı və istilik texnikası” kafedrasına rəhbərlik etmiş, 2012-ci ilə qədər bu vəzifədə fəaliyyət göstərmişdir.

Hazırda AzMİU-da onun rəhbərliyi altında həyata keçirilən elmi-tədqiqat işləri və layihələr bir çox ölkələrdə tətbiq edilməkdədir.

Həsən Feyziyev 1936-cı il sentyabrın 10-da Cəlilabad rayonunun Tahirli kəndində dünyaya göz açmışdır. Bakı Energetika Texnikumu və Azərbaycan Neft və Kimya İnstitutunu fərqlənmə ilə bitirmiş, elmi fəaliyyətini 1969-cu ildə Moskvada VODGEO Elmi-Tədqiqat İnstitutunda müdafiə etdiyi namizədlik dissertasiyası ilə başlamışdır. 1980-ci ildə Moskvada doktorluq dissertasiyasını müdafiə etmiş və 1982-ci ildə professor elmi adına layiq görülmüşdür.

Həsən müəllimin elmi fəaliyyətini üç əsas istiqamətdə təsnif etmək olar:
Dəniz suyunun duzsuzlaşdırılması və şirinləşdirilməsi sahəsində analoqu olmayan texnologiyaların hazırlanması;
İstilik elektrik stansiyalarında istilik sxemlərinin təkmilləşdirilməsi;

Şirin suların ekoloji və iqtisadi səmərəli emalı üzrə innovativ texnologiyaların işlənib hazırlanması.

Həsən Feyziyev dəniz suyunun şirinləşdirilməsi sahəsində elmi yenilikləri ilə AzMİU-nun adını beynəlxalq elmi dairələrdə tanıtmışdır. Onun təklif etdiyi texnologiyalar “Şimal” DRES-də və Sumqayıt istilik elektrik mərkəzində tətbiq olunmuş, yüksək iqtisadi və ekoloji səmərə ilə sınaqdan keçmişdir. Feyziyevin hazırladığı texnologiyalar dünyanın bir çox ölkələrində, o cümlədən Rusiya, Çin, Türkiyə və İsraildə uğurla istifadə edilmişdir.

Həsən müəllim 270-dən çox elmi əsərin, 46 ixtira və patentin, 7 monoqrafiyanın və 10 metodik göstərişin müəllifi olmuşdur. Onun rəhbərliyi altında 27 elmlər namizədi və doktoru hazırlanmışdır. O, AzMİU-ya qazandırdığı beynəlxalq nüfuz və elmi irsi ilə həmişə xatırlanacaqdır.
Azərbaycan Memarlıq və İnşaat Universiteti rektoru və kollektivi professor Həsən Feyziyevin ailəsinə və yaxınlarına dərin hüznlə başsağlığı verir, onun əziz xatirəsini daim yaşadacağını bildirir.

Allah rəhmət eləsin!

Nicat Abdullayev
Onews.az