Nailəxanım Fondu növbəti müsabiqənin nəticələrini açıqlayıb.

Onews.az xəbər verir ki, Xəzər Universitetinin və "Dünya” Məktəbinin
həmtəsisçisi mərhum Nailəxanım İsayevanın adını daşıyan Nailəxanım Fondu növbəti təqdimat mərasimini keçirilib.

Belə ki, 2024-2025–ci illər üçün təqaüd müsabiqəsinin qalibini elan edilib. Hər il bir istedadlı qadın tələbəyə verilən bu təqaüd milliyyətindən və vətəndaşlığından asılı olmayaraq magistratura və ya doktorantura səviyyəsində akademik inkişafın dəstəklənməsi məqsədi daşıyır.

Bu ilki təqaüdün qalibi Şri Lankadan olan Nayanathara Ranmalie Amunarava olub. Xanım Amunarava akademik potensialı və təhsil sahəsinə bağlılığına görə müsabiqə yolu ilə seçilib. "Dünya" məktəblərinin təsisçisi, Nailəxanım fondunun direktoru Aygün İsayeva çıxışında bildirib ki, qadınlara qarşı zorakılıq hallarının qarşısının alınması, habelə hüquqlarının müdafiəsi, gender bərabərliyinin təmin olunması, elm müəssisələrində qadınlara kişilərlə eyni imkanların verilməsi üçün ilk növbədə qız övladlarımız, qadınlar elmli, təhsilli olmalıdır: "Bütün problemlərin açarı təhsildədir. Fond qız və qadınların ( Azərbaycandan və xarici ölkələrdən) magistratura və doktorantura təhsilini və təhsil aldıqları müddətdə Bakıda yaşamaq xərclərini maliyyələşdirir. Biz bu vasitə ilə elmə, təhsilə, qadın dünyasına bacardığımız qədər dəstək olmağa çalışırıq".

Qeyd edək ku, Nailəxanım Fondu DÜNYA Məktəbinin və Xəzər Universitetinin həmtəsisçisi Nailəxanım İsayevanın irsinə ehtiram məqsədilə yaradılıb. Unudulmaz pedaqoq İsayeva hər iki qurumun inkişafında əsas rol oynayıb. Fond daha yüksək akademik məqsədlər uğrunda çalışan istedadlı qadınlar üçün imkanlar yaratmaqla təhsilə və qadın inkişafına xidmətini davam etdirir.
Tədbirdə tanınmış simalar, ictimaiyyət və media nümayəndələri, o cümlədən dövlət rəsmiləri, millət vəkilləri, incəsənət xadimləri, müxtəlif diplomotik korpusların nümayəndələri iştirak ediblər.

Fondun əsas hədəfi akademik mükəmməlliyi təşviq etmək və qlobal miqyasda qadın alimlərin inkişafına töhfə verməkdir. Çıxışçılar bildiriblər ki, Fond akademik məqsədlər uğrunda çalışan istedadlı gənc qadınlar üçün imkanlar açaraq qlobal miqyasda qadın alimlərin inkişafına töhfə verir. Bu kimi layihələr elmi müstəvidə qadın inkişafı baxımından böyük əhəmiyyət kəsb etdiyi üçün elm müstəvisində bu kimi təşəbbüslərin genişlənməsi vacibdir.