Düşünürəm ki, imtahana azı iki-üç gün qalmış abituriyentlər ümumiyyətlə hazırlıq prosesini dayandırmalıdırlar.

Daha çox qidalanmaya və imtahan öncəsi əyləncələrə daha çox önəm verməlidirlər. Bu fikri bir çox pedaqoqlar, eləcə də tibbi mütəxəssislərin araşdırmaları da təsdiqləyir.

İmtahana bir neçə saat qalmışa qədər hazırlaşmaq şagirdlərdə adrenalini daha da artırır ki, bu da onların imtahan prosesində həyəcanlanmasına gətirib çıxarır. Bu da nəticələrə öz təsirini mənfi formada göstərə bilər.

Ümumiyyətlə, imtahana hazırlaşan hər bir şəxsin hazırlıq prosesini özü tənzimləməlidir. Əgər orta məktəb dövründə baza dərsləri uğurlu olubsa, son aşamada özlərinə bu qədər əzab verməyə də dəyməz.

Son aylarda “ciddi hazırlaşma mərhələsi”, özünü yükləmələr həm də valideyn basqıları fonunda müşaiyyət olunur. Valideynlər də bu məsələlərdə övladlarına sərbəstlik verməlidirlər.

Əgər 11 illik təhsil müddətində baza təhsili yaxşı olmayıbsa, son aylarda, həftələrdə “ağır rejimə” keçməyə ehtiyac yoxdur. Ümumiyyətlə, indiki təhsil prosesi şagirdləri daha aşağı siniflərdən hazırlıqlara yönəltməyə sövq edir.

Bu da baza təhslininin fundamentinin yaxşılaşdırılması baxımından önəmlidir.

Sona Əliyeva
V çağırış Milli Məclisin deputatı
Onews.az