Azərbaycan əsgərinin vətənpərvərlik ruhu – Bir ananın baxış bucağından
Vətən sevgisi insanın qəlbində ilk olaraq ailədə formalaşır. Uşaq ilk sözünü anasından
öyrəndiyi kimi, Vətənə olan sevgini də ilk dəfə anasının davranışlarında görür. Ana
övladına dürüstlük, mərhəmət, vətənə bağlılıq və milli-mənəvi dəyərləri aşılayan ilk
müəllimdir. Mən də bir ana olaraq bütün həyatımı övladımı sağlam düşüncəli, vicdanlı,
cəsur və Vətənini sevən bir insan kimi böyütməyə həsr etmişəm.
Həyat hər zaman mənim üzümə gülməyib. Övladımı təkbaşına böyütmək həm mənəvi,
həm də maddi baxımdan çox çətin idi. Lakin mən heç vaxt taleyimdən şikayət
etmədim. Çünki bilirdim ki, mənim güclü olmağım oğlumun da güclü böyüməsinə
səbəb olacaq. Ana olmaq böyük məsuliyyətdir, tək ana olmaq isə ikiqat məsuliyyətdir.
Həm ana, həm ata olmaq, övladın gələcəyini düşünmək, onun təhsilini, tərbiyəsini və
xarakterini formalaşdırmaq böyük fədakarlıq tələb edir.
Mən peşəcə həkiməm. İnsan sağlamlığını qorumaq mənim peşə borcum olduğu kimi,
vətəninə layiqli vətəndaş yetişdirmək də mənim analıq borcum idi. Eyni zamanda Yeni
Azərbaycan Partiyasında fəaliyyət göstərərək dövlətimizin maraqlarını, milli birliyimizi
və gənclərin vətənpərvərlik ruhunda yetişməsini hər zaman dəstəkləmişəm. Mən
inanıram ki, güclü dövlət yalnız güclü ailələr və sağlam düşüncəli gənclər üzərində
qurula bilər.
Oğlumun uşaqlıq illərindən hərb sənətinə marağı var idi. Mən onun bu istəyinə heç vaxt
mane olmadım. Əksinə, ona daim izah edirdim ki, Vətənə xidmət etmək hər bir
Azərbaycan oğlunun ən şərəfli vəzifəsidir. O, əvvəlcə hərbi liseyə qəbul olundu. Daha
sonra böyük zəhmət və yüksək nəticə ilə Türkiyə Hərbi Məktəbinə qəbul qazandı. Bu
xəbəri eşitdiyim gün keçirdiyim hissləri sözlə ifadə etmək çətindir. Mən bir ana kimi
həm kövrəldim, həm də sonsuz qürur hissi keçirdim.
Əlbəttə, hərbi təhsil alan övladın anası olmaq asan deyil. Ana ürəyi daim narahat olur.
Amma mən bilirəm ki, Vətən uğrunda yetişən övlad ən müqəddəs yoldadır. Mən
oğlumu yalnız özüm üçün yox, Azərbaycan üçün böyütdüm. Çünki bu torpaq bizə
əmanətdir və onu qorumaq gələcək nəsillərin müqəddəs borcudur.
44 günlük Vətən müharibəsi bir daha sübut etdi ki, Azərbaycan əsgərinin
vətənpərvərlik ruhu sarsılmazdır. Şəhidlərimizin qəhrəmanlığı, qazilərimizin şücaəti və
Ali Baş Komandanın rəhbərliyi ilə qazanılan Zəfər hər bir azərbaycanlının qəlbində
əbədi yaşayacaq. Bu ruhun formalaşmasında anaların əməyi danılmazdır. Çünki
qəhrəman əsgərləri məhz analar böyüdür.
Mən hər zaman oğluma demişəm ki, hərbçi olmaq sadəcə peşə deyil, böyük şərəf və
məsuliyyətdir. Hərbi forma geyinən insan ilk növbədə Vətənə, dövlətə və xalqa sədaqət
andı içir. Mən onun bu müqəddəs yolu seçməsinə görə qürur duyuram.
İnanıram ki, bugünkü gənclərimiz elmli, vətənpərvər və güclü olduqca Azərbaycan
daha da qüdrətli olacaq. Biz analar övladlarımızı yalnız yaxşı peşə sahibi kimi deyil,
həm də vicdanlı, mərd və Vətəninə sadiq insanlar kimi böyütməliyik. Çünki gələcəyimizi
qoruyacaq olanlar məhz bu gün böyütdüyümüz övladlardır.
Sonda bir ana kimi demək istəyirəm ki, Vətən sevgisi öyrədilən ən müqəddəs hissdir.
Mən oğlumu bu hisslə böyütdüm və bu gün onun seçdiyi yolla qürur duyuram. Qoy hər
bir Azərbaycan əsgəri Vətənimizi daim uca tutsun, hər bir ana isə belə övlad
yetişdirdiyinə görə fəxr etsin. Güclü Azərbaycan Ordusu xalqımızın qürur mənbəyidir və
bu ordunun əsasında vətənpərvər ruhda böyüyən oğullar dayanır.

Həkim, Arzu Əliyeva
4 nömrəli Şəhər Poliklinikası