Quliyeva Günay — Azərbaycan Dövlət Neft və Sənaye Universitetinin (ADNSU) nəzdində fəaliyyət göstərən Sənaye və Texnologiya Kollecinin əməkdaşı.

26 İyun Azərbaycan dövlətçiliyinin, milli təhlükəsizliyinin və hərbi qüdrətinin rəmzi olan Silahlı Qüvvələr Günüdür. Bu əlamətdar günün tarixi 1918-ci il iyunun 26-na, Azərbaycan Xalq Cümhuriyyəti tərəfindən ilk nizami hərbi hissələrin yaradıldığı günə təsadüf edir. Həmin tarix milli ordu quruculuğunun əsasının qoyulduğu gün kimi ölkəmizin tarixində xüsusi yer tutur. Müstəqilliyimizin bərpasından sonra Azərbaycan Ordusunun formalaşdırılması və inkişafı Ümummilli Lider Heydər Əliyevin adı ilə bağlıdır. Onun rəhbərliyi dövründə ordu quruculuğu dövlət siyasətinin əsas istiqamətlərindən birinə çevrilmiş, Silahlı Qüvvələrin maddi-texniki bazası gücləndirilmiş, peşəkar hərbi kadrların hazırlanmasına xüsusi diqqət yetirilmişdir. 1998-ci ildə imzalanmış Sərəncamla 26 İyun Azərbaycan Silahlı Qüvvələri Günü kimi təsis edilmişdir. Bu gün Azərbaycan Ordusu regionun ən güclü və peşəkar ordularından biri hesab olunur. Ordumuz ölkəmizin suverenliyinin, ərazi bütövlüyünün və milli maraqlarının etibarlı təminatçısıdır. Azərbaycan əsgərinin göstərdiyi qəhrəmanlıq, xüsusilə Vətən müharibəsində qazanılmış tarixi Zəfər, dövlətimizin siyasi iradəsini, xalqımızın birliyini və ordumuzun yüksək döyüş qabiliyyətini bütün dünyaya nümayiş etdirmişdir. Güclü ordu hər bir müstəqil dövlətin əsas dayaqlarından biridir. Azərbaycan Silahlı Qüvvələri bu gün müasir silahlanmaya, yüksək hazırlığa və sarsılmaz vətənpərvərlik ruhuna malikdir. Dövlətimizin müdafiə qüdrətinin möhkəmləndirilməsi, ölkəmizdə sabitliyin və təhlükəsizliyin qorunması istiqamətində ordumuzun rolu əvəzsizdir.