"İranda, iyun ayının 28-nə nəzərdə tutulan növbədənkənar seçkilər, əvvəlki prezident Ebrahim Raisinin helikopter qəzasında həlak olması ilə əlaqədardır. Ümid etmək istərdim ki, yeni hakimiyyət, son zamanlar Azərbaycanla münasibətlərin normallaşması istiqamətində sələfinin başlatdığı siyasəti davam etdirəcək".

Bunu Onews.az-a açıqlamasında Milli Məclisin deputatı Nəsib Məhəməliyev deyib.

Millət vəkili xatırladıb ki, may ayının 19-da Azərbaycan və İran prezidentləri İlham Əliyevlə, Ebrahim Raisi arasında tarixi görüş baş tutdu:

"Ölkə rəhbərləri hər iki ölkənin xalqlarına xidmət edəcək, iki böyük layihənin, “Xudafərin” və “Qız Qalası” su qovşaqlarının istismara verilməsinin açılışında iştirak etdilər. Yeni müştərək layihələrin icrası ilə bağlı razılaşmalar əldə edildi. Bütün bunlar onu göstərir ki, hər iki ölkənin siyasi rəhbərliyi mövcud reallıqları, qlobal çağırışları düzgün qiymətləndirirlər. Regionda əməkdaşlığın, normal münasibətlərin alternativinin olmadığının, qarşıdurmanın isə, üçüncü dövlətlərin mənafeyinə işlədiyinin fərqindədirlər. Təsadüfi deyil ki, Prezident İlham Əliyev, bu görüşü “tarixi görüş” olaraq qiymətləndirmişdi. İran böyük dövlətdir və bizi tarixi, dini, mədəni tellər bağlayır. Əfsuslar olsun ki, 30 illik işğal dövründə cənub qonşumuzun düşmənlərimizin yanında olduğunu, hər tərəfli dəstək verdiyinə şahidlik etdik. Ancaq, bütün bunlara rəğmən Azərbaycan dövləti hər zaman mehriban qonşuluq siyasətinə sadiq qalmış, İran əleyhinə hər hansı layihədə yer almayıb".

Deputat Nəsib Məhəməliyevin sözlərinə görə, reallıq ondadır ki, İran dövlət idarəetmə sistemində prezidentin səlahiyyətləri məhduddur:

"Demək olar ki, prezident daha çox baş nazir funksiyasını yerinə yetirir. Orada əsas söz sahibi ali dini rəhbərdir və dövlətin xarici siyasətini məhz, o müəyyən edir. Eyni zamanda, son 30 ilin təcrübəsi göstərir ki, prezidentliyə namizədlər belə, Rəhbərin xeyir-duası olmadan namizəd kimi qeydiyyata alına bilməz. Hətta, qeyfiyata alınsa da, seçilmək imkanı sıfra bərabərdir. Hal-hazırki vəziyyətdə İranda, əsasən iki siyasi cərəyanı, radikal dinçiləri və liberalları qeyd etmək olar. İran liberalları, digər ölkələrdə olduğu kimi, klassik anlamda qəbul edilməməlidir. Məsələ ondadır ki, hər iki cərəyanın nümayəndələri mövcud quruluşun, teokratik rejimin tərəfdarı olaraq çıxış edirlər. Sərhəd görüşündə, mərhum Rəisi, “bizim əməkdaşlığımız bir çoxlarını narahat edir” fikirlərini təsadüfən səsləndirməmişdi. Həqiqətən də, həm İranın daxilində, həm də xaricdə ölkələrimizin əməkdaşlığını gözü götürməyən, ondan narahat olan kifayət qədər qüvvələr mövcuddur".

Deputatın yanaşmasına görə, heç şübhəsiz, münasibətlərin normallaşması, ölkələrimizin inkişafına, xalqlarımızın rifahına, bölgədə təhlükəsizliyin qorunmasına xidmət edəcək:


"Yeni seçiləcək prezident başa düşməlidir ki, Bakıya qarşı radikal meyllərin perspektivi yoxdur və heç bir effekti ola bilməz. Azərbaycan güclü, subyektivliyini təsdiq etmiş dövlətdir və öz maraqlarını müdafiə etmək iqtidarındadır. Bunu hər kəsin bilməsi lazımdır. Mənə elə gəlir ki, növbəti prezident, hazırki siyasi kursu daha da sərt şəkildə davam etdirən, ali dini Rəhbərə yaxın şəxslərdən biri seçiləcək".

Turan