Yuxunun müddəti genetik, yuxu zamanı bədənin vəziyyəti isə psixoloji köklərə malikdir. Bəzi adamlar tənbəl olduqları üçün deyil, daxili bioloji saatlarının tələbinə uyğun çox yatırlar.

Onews.az xəbər verir ki, yuxunun müddəti əsəb fəaliyyətinin növündən və yaşdan asılıdır. Adətən, həssas və fiziki cəhətdən fəal həyat tərzi sürən adamlara gündə 6-7 saat yatmaq kifayətdir. Lakin zehni əməklə məşğul olan adamlara gündə 9 saat da bəs etmir. Yaş ötdükcə, insanlar daha az yatırlar.

Ancaq bu, sağlamlığın göstəricisi deyildir. Ahıl və qoca yaşlarında yuxunun müddətinin uzadılması zəruridir və fizioloji cəhətdən özünü doğruldur.

Uzun müddət yatmayan insanlarda təfəkkür və qavrama qabiliyyəti zəifləyir. Merilənd ştatının Besezda şəhərindəki Milli Sağlamlıq İnstitutunun alimləri tədqiqatda iştirak edən adamları iki qrupa – 9 və 6 saat yatanlara bölmüşlər.

Tədqiqat zamanı bütün iştirakçıları yatmağa qoymamış və hormonların səviyyəsini, bədənin temperaturunu və yuxuculluğu ölçmüşlər.

Sağlam admların üzərində aparılan müşahidələr göstərmişdir ki, 1 və ya 2 gün yuxusuz qalmaq orqanizmdə və psixoloji durumda ciddi pozuntulara səbəb olmamış, yalnız yorğunluq, yuxululuq, əsəbilik, huşsuzluq kimi hallar nəzərə çarpmışdır.

Bu cür tədqiqatların insanlar üzərində 2-3 gündən artıq aparılması mümkün olmadığından, uzun müddət yuxusuz qalmağın nəticələri heyvanlar üzərində öyrənilir.

Napoleon gündə 2 dəfə, lakin az yatırdı. O, axşam saat 10 və 12 arasında yuxuya gedir, gecə saat 2-də oyanırdı.

Səhər saat 5-dək işlədikdən sonra 7-yə kimi yatırdı. Çörçillə və Edisona gündə 4-6 saat yuxu kifayət edirdi.

Uinston Çörçill gecə 3-4-dək işləyərək, səhər saat 8-də artıq ayaq üstə olsa da, nahardan sonra iki saat dincəlməyi unutmurdu.

Çoxyatan dühalara isə Albert Eynşteyni misal gətirmək olar. O, gecənin 10 saatını yataqda keçirirdi. Özünün dediyinə görə, nisbilik nəzəriyyəsinin ən mühüm elementlərinin bəzilərini yuxuda kəşf etmişdi.

Banu Murad