Bu ölkənin paytaxtı Fritaun əvvəllər qul bazarı kimi məşhurlaşmışdı.
Afrikadan və Amerikadan gətirilən aborigen qullar məhz burada satılırdı.
Qul satışının “azad ticarət zonası” idi.

Sonradan qul tacirlərinin daimi yaşayış məntəqəsinə çevrildi.
İllər sonra həmin qul bazarı bu dəfə yolumuzu salacağımız ölkənin paytaxtı oldu.

Ölkənin ilk vətəndaşları da tacirlər və qullar hesab edilir.
Dövlətin əhalisi Yamaykadan olan keçmiş qulların repatriasiyası hesabına xeyli artırılmışdı...

Onews.az xəbər verir ki, söhbət Syerre Lionedən gedir.

Bu məmləkət Afrika qitəsinin qərbində, Atlantik okeanı sahillərində yerləşir.
Respublikanın əhalisi cəmi 8 milyon nəfərdir.
Syerra Leonenin rəsmi dili ingilis dilidir.
Amma praktikada demək olar ki, heç kim bu dildə danışmır.
Ölkə əhalisinin 90%-i 20 ən böyük yerli qəbilədən ibarətdir.
Burada qadınların yarısı, kişilərin isə dörddə üçü əlifba tanımırlar.
Yəni insanların böyük əksəriyyəti savadsızdırlar.

1607-ci ildə Şeksprin “Hamlet” əsəri ilk dəfə məhz bu ölkədə səhnələşdirilmişdi.
Tamaşa “Şərqi Hindistan” şirkətinin əməkdaşları üçün göstərilmişdi.
Bu ölkə yalnız iki digər dövlətlə – Liberiya və Qvineya Respublikası ilə həmsərhəddir.
Ölkə, qonşusu Liberiya kimi azad edilmiş Afrikalı qullar tərəfindən qurulub.

Syerra Leone 1961-ci ildə ingilis müstəmləkə əsarətindən çıxaraq müstəqilliyini elan etmişdi.
10 il sonra krallıq üsul-idarə sistemindən imtina edərək, respublikaya çevirilmişdi.
90-cı illərdən başlayaraq 2002-ci ildə qədər dağıdıcı bir vətəndaş müharibəsi yaşamışdı.
Ölkə ərazisində indi də BMT sülhməramlıları fəaliyyət göstərməkdədir.
Almaz mədənləri baxımından olduqca zəngindir.

Buna baxmayaraq qərbli müstəmləkəçilərin təhrik etdiyi və göz yumduğu vətəndaş müharibəsi nəticəsində bir xeyli yoxsullaşıb.
Əsas ixracat məhsulları almaz,pivə,siqaret,ayaqqabı və gön dəridir.
Kənd təsərrüfatı məhsulları düyü, qəhvə, palma toxumu, yer fıstığıdır.

Ayrıca iqtisadi gəlir gətirən başda balıqçılıq olmaqla ev heyvandarlığı, mal-qoyun-donuz da yetişdirilir.
Syerra-Leone yeraltı qazıntılar, o cümlədən almaz və boksit kimi qiymətli minerallarla zəngindir.
Ölkənin yerli sahilləri fasiləsiz manqrov kolluqları ilə örtülüdür.

“Bədəvi” kolluqlar bəzi yerlərdə materikin dərinliklərinə qədər uzanır.
Şəhər hüdudlarından kənarda burada timsahlar həqiqətən təhlükəlidir.
Paytaxt ətrafında kəndlilər çox vaxt onların qurbanına çevrilirlər.
Ağcaqanadlar yay aylarında özləri ilə malyariyanı da ölkə əhalisi üçün “hədiyyə” gətirirlər.
Ölkədə səhiyyə durumunun acınacaqlı olması isə vəziyyəti daha da qəlizləşdirir...
Yerli əhalinin yarıdan çoxu müsəlmandır.

Amma sakinlərin təxminən üçdə biri hələ də aborigen kultlarına etiqad edir.
Ölkənin hər onuncu sakini isə xristiandır.

2007-ci ildə Böyük Britaniyanın keçmiş baş naziri Tony Blair təntənəli şəkildə Syerra Leonenin ali lideri elan edilmişdi.
Bu fəxri ad ona bu bölgələrdə vətəndaş müharibəsinin dayandırılmasına verdiyi töhfəyə görə verilmişdi.
Maraqlıdır ki, Syerra Leonenin milli mətbəxinə ət məhsulları daxil deyil.
Ölkə əhalisinin üçdə ikisi yoxsulluq həddinin altında yaşayır.

Burada ictimai nəqliyyat əsasən mikroavtobuslardan ibarətdir.
Bu nəqliyyat vasitələri əsasən köhnə mikroavtobuslar və ya yük maşınlarıdır.
Sierra Leonedə internet də çox pis durumdadır.
İnternet sadəcə paytaxtın bir neçə otelində mövcuddur.
Ölkədə cəmi bir neçə nöqtədə internet kafe fəaliyyət göstərir.
Başqa heç bir yerdə Ümumdünya Şəbəkəsinə çıxış yoxdur.

Tural Turan