"Ermənistanın Xarici İşlər naziri Ararat Mirzoyanın fikirlərinə inansaq, Azərbaycan və Ermənistan preambula, o cümlədən müqavilə mətninin 17-dən 15-i üzrə razılığa gəliblər. Ermənistanın baş diplomatının bu açıqlamasından o qənaətə gəlmək olar ki, İrəvan Qərbdəki bəzi dairələrin süni təhrikləri fonunda Bakı ilə qaçaraq sülh sazişinə imza atmaq istəyir. Hətta bədnam qonşularımız ilin sonuna qədər Azərbaycanla sülh müqaviləsinə yekun vurmaqda daha çox "maraqlıdır". Bununla da təzminat və dəhliz məsələsini həll etmədən masadan qazanclı ayrılmaq haqqında fikirləşirlər. Amma 35 illik münaqişəni bu qədər qısa müddətdə və tələskənliklə həll etmək mümkün deyil".

Bunu Onews.az-a açıqlamasında siyasi şərhçi Tural Turan deyib.

Ekspertin fikrincə, Ermənistan 30 illik işğala və Azərbaycan xalqına vurduqları mənəvi zərərə görə təzminat ödəmək istəmirlər:

"Razılaşdırılmamış məsələlərdən də biri çox güman ki, bu nüansdır. Eyni zamanda, Zəngəzur dəhlizi ilə bağlı müzakirələri də "sonrakı mərhələyə" saxlamaq istəyirlər. Bu nünaslar həll edilmədən sülh masası qurula bilməz. Çünki müqavilə mahiyyət etibarı ilə yarımçıq qalacaq. İrəvan Zəngəzur dəhlizini də "başqa müstəvidə fərqli şərtlərlə" həll etməyə ümidlidir. Əslində dəhliz məsələsi ilə bağlı Bakı və İrəvan arasında hər hansı ciddi bir problem görünmür. Əsas problem İrəvanla Kreml arasındadır. Moskva isə dəhlizin təhlükəsizliyinə əsas qarant kimi özünü görür. Kənar gücləri regiona buraxmamaqda israrlıdır. Təzminatın ödənilməsi də ciddi şəkildə müzakirə olunmalıdır. Ortada bir trilyon dollarlıq təzminat məsələsi var. Hələ bu rəqəm də tam deyil. Dəymiş ziyanın daha çox olduğunu düşünürəm. Çünki erməni vandalizminin xalqımıza vurduğu ziyanın müxtəlif parametrlər üzrə miqyası çox böyükdür. Üstəlik, Ermənistan hələ də Azərbaycanın dörd kəndini işğal altında saxlayır. Sülh sazişinə qədər həmin kəndlərin taleyi də bizim xeyrimizə həll edilməlidir. Ondan sonrakı mərhələlərdə sərhədlərin delimitasiya və demarkasiya məsələsini tələsmədən həll etmək mümkündür".

Banu Murad