"Buraxılış və qəbul imtahanlarının rəqəmsəl qaydada keçirilməsi Azərbaycan təhsilində şəffaflaşdırmaq prosesinə böyük töhvə verə bilər. Əsas odur ki, onun keçirilmə qaydaları, konsepsiyaları mükəmməl və ya ona yaxın olsun. Rəqəmsal imtahanlarla bağlı aparıcı ölkələrin təcrübələri öyrənilməlidir".

Bunu Onews.az-a Milli Məclisin keçmiş deputatı Sona Əliyeva deyib.

Keçmiş millət vəkili bildirib ki, eyni zamanda, bu yenilik xəytti yerli resurslara da uyğunlaşdırılmalıdır:

"İstənilən innovativ yenilik mövcud baza və resurslarla uyğunluq təşkil etmədikdə nəticələr bir o qədər effektiv olmur. Hətta bəzi hallarda inkişaf prosesinə ciddi zərbələr də vura bilir. İstənilən halda yeniliyə və inkişafa cəhdin özü də müsbət qiymətləndirilməlidir. Ən əsası rəqəmsal imtahan dili sadələşdirilmiş, asan və əlçatan, operativ olmalıdır. Çoxşaxəli rəqəmsal prosedurlardan qaçmalıyıq. Rəqəmsal imtahanların fin modeli tətbiq edilsə, düşünürəm ki, bizim təhsilimizdə, imtahan prosesində böyük irəliləyişlərə nail ola bilərik. Polşa, ABŞ və Yaponiya modelləri bizim təhsil sistemimizə bir qədər yaddır. Daha dəqiq desək, bizim o cür çoxşaxəli proseslərin idarəsi üçün yetərli sayda mütəxəssisimiz yoxdur və ya olduqca azdır".

Sona Əliyeva mobil telefonların və ağıllı cihazların orta məktəblərdə qadağan edilməsini alqışladığını dilə gətirib:

"Çünki qadağan olunmuş sektor 18 yaşdan aşağı şəxslərdir. Bu, onların təlim və tərbiyə prosesinə müsbət təsir göstərəcək. Məsələnin digər tərəfi ondan ibarətdir ki, tədris ocaqlarında məhdud internet xətti tətbiq etməklə telefon və ağıllı cihazlardan təhsildə inkişaf məqsədi ilə istifadə etmək mümkündür. Amma bunun üçün külli miqdarda vəsait lazımdır ki, biz Şərqi Avropadakı orta ümumtəhsil məktəblərinə çata bilək. Polşada, Macarıstanda tədris ocaqlarında ancaq bəlli saytlara, axtarış sistemlərinə daxil ola biləcək internet xətləri mövcuddur. Şagirdlər öz telefonları ilə həmin internet xəttinə qoşularaq lazımı bilikləri yerində və anında götürə bilirlər. Amma indi bizdə belə bir sistem yoxdur və onun formalaşdırılması, bütün ölkəni əhatə etməsi üçün azı bir neçə il zaman lazımdır. Bəlkə də indi bu prosesə başlanılsa, yaxın gələcəkdə təhsildə irəliləyişə nail olmaq mümkündür. Universitetlərdə ağıllı cihazların, telefonların qadağan olunmasına qarşıyam. Birincisi, tələbələrin əksəriyyəti 18 yaşdan yuxarıdır. Onlar yetkin vətəndaşdırlar, özləri haqqında qərarları özləri vermək yaşındadırlar. Üç-beş ambisiyasız tələbəyə görə, axtaran, araşdırmalara meyilli şagirdlərin önünü kəsmək olmaz".

Fuad Süleyman