19 yanvar tarixində “Təhsildə İnkişaf – Təhsilli Gələcək” İctimai Birliyinin sədri Sona Əliyevanın rəhbərliyi altında, Birliyin nəzdində fəaliyyət göstərən EduClub platformasının rəhbəri Nərgiz Məmmədova ilə Azərbaycan Autizm Assosiasiyasının sədri, eyni zamanda Türk Dünyası Autizm Federasiyasının prezidenti Elnur Məmmədli arasında əməkdaşlıq haqqında Memorandum imzalanmışdır.

İmzalanan memorandumun əsas məqsədi autizm spektr pozuntusu olan şəxslərin təhsil imkanlarının genişləndirilməsi, inklüziv təhsilin təşviqi, sosial adaptasiya prosesinin gücləndirilməsi, valideynlər və mütəxəssislər üçün maarifləndirici və praktik fəaliyyətlərin həyata keçirilməsidir.

Əməkdaşlıq çərçivəsində aşağıdakı istiqamətlər üzrə birgə fəaliyyətlərin həyata keçirilməsi nəzərdə tutulur:

inklüziv təhsil və autizm mövzusunda seminar və təlimlərin təşkili,

müəllimlər, psixoloqlar və valideynlər üçün bilik və bacarıqların artırılması,

maarifləndirici layihə və sosial kampaniyaların icrası,

Türk dünyası üzrə təcrübə mübadiləsi və birgə beynəlxalq təşəbbüslərin reallaşdırılması,

təhsildə innovativ və inklüziv yanaşmaların tətbiqi.

Tərəflər memorandumun autizm sahəsində institusional əməkdaşlığın möhkəmlənməsinə, təhsildə bərabər imkanların yaradılmasına və inklüziv cəmiyyətin formalaşmasına mühüm töhfə verəcəyini bildirmişlər.

Qeyd olunub ki, bu əməkdaşlıq “Təhsildə İnkişaf – Təhsilli Gələcək” İctimai Birliyi və EduClub platformasının sosial məsuliyyət, inklüzivlik və davamlı inkişaf strategiyasının əsas istiqamətlərindən biri kimi qiymətləndirilir və uzunmüddətli perspektivdə konkret sosial təsir yaratmağa hədəflənir.

Rauf
Onews.az