Modern özbək ədəbiyyatı hazırda özünün qızıl dövrünü yaşayır.

Özbəkistan 1991-ci ildə özgürlüyünə qovuşduqdan sonra qardaş ölkədə ədəbiyyat və mədəniyyət sürətlə inkişaf etməyə başladı.

Qərb və Şərq ədəbi ənənələri burada özünəməxsus şəkildə çuğlaşdı, qucaqlaşdı.

Hazırda Özbəkistan Orta Asiyanın ədəbiyyat və mədəniyyət mərkəzinə çevrilməkdədir. Qardaş ölkə son otuz ildə bu sahədə iri addımlarla irəliləməkdədir.

Şübhəsiz ki, müasir Özbəkistan poeziyası və nəsri bu sürətli irəliləyişə görə, müstəqillik dövrü gənclərinə, yazarlarına borcludur. Çünki müstəqillik illərində yetişən gənc nəsil çoxəsirlik özbək poeziya və ədəbi ənənələrinə söykənərək yeni yüz ildə özünəxas uğurlu cığır aça bildi.
Son otuz ildə modern özbək ədəbiyyatında bir sıra uğurlu imzaların ulduzları parlamağa başladı. Onlardan biri də heç şübhəsiz ki, Cahangir Namazovdur. Namanqanda doğulan 26 yaşlı bu gənc kifayət qədər fəaldır. Artıq öz fəallığı və açılımı ilə dünya ədəbiyyatının qapısını döyməyə başlayıb.

O, uğurlu yol tutaraq öz yaradıcılıq potensialını bütün dünya ilə tanış etmək istəyir. Bir çox ölkələrin ədəbi təşkilatlarında təmsil olunur. Şeirləri, düzgüləri bir çox xalqların dilinə çevrilib. Dərgilərdə, toplularda nəşr edilib.

Cahangir Namazovun şeirləri ilə hələ bir neçə il öncədən tanışam. Onun haqqında çalışdığım “Türküstan” qəzetində də tanıtım məqaləsi dərc etmişdim. Azərbaycan ədəbiyyatına dərindən maraq göstərən bu gənc özbək qardaşım buradakı türk oxuculara da tanışdır.

Onun poeziyasında da Şərqlə Qərb elementləri iç-içədir. Cahangirin poeziyasında qədim Şərq və özbək poeziyasının izləri qalın xətlə keçir. Lirik poetik düşüncələr o qədər həssaslıqla işlənib ki, kövrək notları elə ilk misralardan duyursan.

Cahangirin şeirlərində həm də işıqlı sabahlara böyük ümidlər var. Sevginin dili olmadığı kimi, onun kövrək hislərinin də dili yoxdur. O, dünyanın rənglərini öz rəngləri hesab edir, ona görə də milli olduğu qədər də bəşəri şairdir.

Cahangirin sevgi şeirlərinin özünəxaslığının əsas göstəricilərindən biri də xaotikliyidir. Bu dağınıq fikirlər, düşüncələr burulğanında çırpınan poetika heç bir yaradıcılıq izinə bənzəmir.

Əlinizdə tutduğunuz bu kitab şair Cahangir Namazovun Azərbaycan dilində oxucuları ilə görüşdüyü ilk bitikdir. Ümid edirəm ki, bu kitab Özbəkistan-Azərbaycan ədəbi əlaqələrinin inkişafında mühüm töhfə olacaq.

Ona dünya ədəbiyyatını fəth etməyi arzulayıram. O, çoxəsirlik özbək poeziya ənənələrinə sadiq qalaraq və yenilikçi düşüncələrinə çağdaş poetik elementləri əlavə edərək bu istəyini gerçəkləşdirə biləcək. Ən əsası, modern özbək poeziyanın fatehi tituluna yiyələnərək dünya ədəbiyyatının min illik Cahangirinə çevriləcək...

Tural Turan
Onews.az