Səbinə Yunusova
Azərbaycan Yerüstü Nəqliyyat Agentliyinin (AYNA) Ümumi şöbəsinin baş məsləhətçisi, YAP Nərimanov Rayon Təşkilatı üzrə ƏPT-nin sədr müavini

Azərbaycan əsgərinin vətənpərvərlik ruhu – sadəcə hərbi nizamnamələrin deyil, əsrlərin sınağından keçib gələn milli yaddaşın, laylaların və qəhrəmanlıq dastanlarının yoğurduğu sarsılmaz bir mənəviyyat rəmzidir. Bu ruh, canını sipər etdiyi torpağı "Vətən" edən sarsılmaz inamın adıdır.
Milli kimliyimizin və xarakterimizin ən uca zirvəsi olan Vətən, sadəcə xəritədə çəkilmiş sərhədlərdən ibarət coğrafi məkan deyil, o, xalqımızın mənəvi varlığı, şəhidlərin əbədiyyət taxtına ucaldığı müqəddəs bir and yeridir. Azərbaycan əsgəri isə bu müqəddəsliyin sarsılmaz keşikçisidir. Hər bir əsgərin daxilindəki vətənpərvərlik duyğusu, hərbi vəzifə dərkindən daha çox, bu torpağın hər bir daşına, hər bir qarışına bəslənən saf, təmənnasız və ülvi bir sevginin təzahürüdür.
Azərbaycan əsgərinin mənəvi gücü onun həm də tarixi varisliyindən qaynaqlanır. Bu ruh, müqəddəs bayrağın dalğalandığı hər zirvəni canı bahasına qorumaq məsuliyyətidir; döyüş meydanında keçilməz sıldırımları yalın əllə, sarsılmaz imanla aşan qorxusuzluqdur, zəfəri hərbi taktika ilə yanaşı, mənəvi üstünlüklə, haqqın və ədalətin səsi ilə qazanmaq iradəsidir.
Məqsədi zəfər olan 44 günlük vətən müharibəsində və lokal antiterror tədbirlərində bütün dünyaya nümayiş etdirilən bu misilsiz fədakarlıq sübut etdi ki, ən müasir silahlar belə Vətən sevgisi ilə döyünən bir ürəyin qarşısında acizdir. Azərbaycan əsgərinin vətənpərvərlik ruhu dövlətimizin sarsılmaz hərbi qüdrətinin təməl sütunu, xalqımızın isə ən böyük mənəvi sərvətidir. O, dünənimizin qisası, bu günümüzün mənəvi dayağı və sabahımızın əbədi işığıdır! Bu sarsılmaz ruhun, birliyin və qüdrətin ən ali təcəssümü isə tariximizə qızıl hərflərlə yazılmış Dəmir yumruqdur!