Azərbaycan heç vaxt AŞPA ilə münasibətləri tam şəkildə bitirməyib.

Biz qarşılıqlı etimad çərçivəsində Avropa Şurası Parlament Assambleyası ilə əməkdaşlıqda maraqlıyıq. Ölkəmizə qarşı ikili standartlardan çıxış edən həmişə qarşı tərəf olub.

Əgər AŞPA öz səhvini düzəltməsə və ölkəmizə qarşı qərəzə son qoymasa, bu əlaqələr bərpa edilə bilməz.

Düşünürəm ki, AŞPA öz içərisində islahatlara, təmizlənmə və tənzimləmələrə getməli, Şvabe kimi qatı antiazərbaycan mövqeli şəxslər bu qurumdan kənarlaşdırılmalıdır.

Heç bir beynəlxalq təşkilat Azərbaycanın daxili işlərinə qarışa və ölkəmizə qarşı əsassız ittihamlarla çıxış edə bilməz.

Qərb institutları və beyin mərkəzləri də yaxşı anlayırlar ki, indiki çətin və mürəkkəb geosiyasi mərhələdə Azərbaycanla ancaq dost olmaq mümkündür.

Hesab edirəm ki, indiki mərhələdə AŞPA ilə yaranmış gərginlikdən və qeyri-müəyyənlikdən itirən tərəf məhz adıçəkilən qurumdur. Azərbaycan heç nə itirmir.

Eyni zamanda, AŞPA bu cür qərəzli davranışlara son qoymasa, yaxın gələcəkdə qurumun Güney Qafqazla bağlı siyasəti dalana bilər.

Biz Avropa İttifaqı ilə mehriban qonşuluq siyasətinə hər zaman sadiq olmuşuq və qurumun Güney Qafqaz siyasətinə böyük töhfələr vermişik.

Düşünürəm ki, bütün bunları AŞPA rəsmiləri görməzdən gəlməməlidirlər. Azərbaycan AŞPA ilə əməkdaşlığa hər zaman hazırdır, amma qarşı tərəf hələ ki, pozduğu münasibətləri bərpa etməyə səy göstərmir.

Eyni zamanda, AŞPA-ya daxil olan ölkələr ayrı-ayrılıqda Azərbaycanla sıx əməkdaşlığa can atır.

Deməli, Avropa Şurası Parlament Assambleyasının da öz səhvini dərk etməsinə az qalıb.

Sona Əliyeva
V çağırış Milli Məclisin deputatı
Onews.az